BUDGET SA 2016 NILAGDAAN NA. Isa nang ganap na batas ang General Appropriations Act of 2016 sa paglagda ni Pangulong Benigno Simeon C. Aquino III sa simpleng sermonya sa Rizal Hall ng Malacanang kanina. Nasa kanyang kaliwa si Senate President Franklin M. Drilon at nasa kanyang kanan si House Speaker Feliciano Q. Belmonte, Jr. (Malacanang Photo)
NILAGDAAN na ni Pangulong Benigno Simeon C. Aquino III ang P 3.002 trilyong budget para sa 2016.
Naganap ang paglagda sa 2016 General Appropriations Act sa Rizal Hall ng Malacanang at sinaksihan ng mga kasapi ng dalawang kapulungan ng kongreso at ilang mga opisyal ng pamahalaan.
Sa kanyang talumpati, sinabi ni Pangulong Aquino na tuloy ang pagbuhos ng pondo sa mga serbisyong panglipunan. Mas mataas ito ng P396 bilyon sa nakalipas na budget.
Napapaloob sa social services ang pabahay, kabuhayan at community-driven projects na nagkakahalaga ng P1.106 na trilyon o 36.8 % na buong budget.
Nadoble umano ang national budget noong 2010 at naglalaan ng pinakamalaking alokasyon sa serbisyong panglipunan.
Sinabi ni Budget and Management Secretary Florencio Abad na ang budget sa 2016 ang ika-anim na taong sunod na naipasa ayon sa schedule.
Ipinaliwanag pa niyang ito ang pagpapakita ng pamahalaan ng pangakong pagtutuunan ng pansin ang social services na pakikinabangan ng mga mamamayan.
Ang economic services ay nagkakahalaga ng P829.6 bilyon o 27.6% ng bagong lagdang budget. Sasaklaw ito sa pagawaing bayan, pagsasaka, at maging transport and communications.
Ang Department of Education ang nakatanggap ng pinakamalaking bahagi ng budget na nagkakahalaga ng P437 bilyon. Kasunod ng DepEd ang Department of Public Works and Highways na nagkaroon ng P400.4 bilyon, Department of National Defense na mayroong P175.2 bilyon, Department of Interior and Local Government na mayroong P154.5 bilyon at Department of Health na mayroong P128.5 bilyon.
1 2 3 4 
