NSA Clarita Carlos: Pagsusulong ng “low politics” makakatulong sa paglutas ng mas matinding mga isyu sa pagitin ng Pilipinas at Tsina

Si National Security Adviser Clarita Carlos ay isa sa tatlong opisyal ng Pilipinas na nakipagtagpo kay Chinese Foreign Minister Wang Yi.  Sa kanilang pag-uusap, natalakay ang pagsusulong ng apat na larangan ng kooperasyong kinabibilangan ng agrikultura, imprastruktura, enerhiya at pagpapalitan sa pagitan ng mga mamamayan.

Matatandaang dumalaw si Ministro Wang sa Pilipinas noong Hulyo 6, 2022 bilang bahagi ng kanyang opisyal na byahe sa mga bansang Timogsilangang Asya.

Sa panayam ng  programang Pilipinas Muna  sinabi ni  Carlos na inilahad niya  ideya ng low politics kay Wang. Aniya habang tinatalakay ang isyu ng karagatan, na kasalukuyang pinaghihidwaan ng Pilipinas at Tsina, dapat ay bigyang pansin din ang ibang bahagi ng ugnayan ng dalawang bansa na maaaring payabungin. Sa mga larangang ito, pwedeng itatag ang pagtitiwalaan, kumpiyansa at katapatan ng loob. Kapag naisagawa na ito, naniniwala si Carlos na makakatulong ang goodwill na nabuo sa low politics para mas mabuting talakayin ang sensitibo at masalimuot na problema ng relasyon ng dalawang bansa. Ang mga problema o isyu na ito ay  napapaloob sa high politics, diin niya.  Nagustuhan  ni  Wang ang ideyang inilahad ng unang babaeng NSA ng Pilipinas, na nanunungkulan din bilang Director General ng National Security Council. Sa kabuuan, inilarawan ni Carlos ang naging pulong  kay Wang bilang“More than well, Excellent!”

Hinggil naman sa geopolitics na ngayon ay lumilikha ng tensyon sa mga superpowers habang pinalalawig  ang impluwensya sa rehiyon, ibinahagi ni  Carlos na  gusto ni  Wang na magkaroon ng  maritime security at fishing rights cooperation ang Tsina at  Pilipinas. Umaasa si  Carlos na magkakaroon  ng kooperasyon at komunikasyon sa mga usaping ito at muli  niyang inulit ang kabutihang makukuha sa pagsusulong ng  low politics.

Kaugnay ng people-to-people exchanges, sa pakikipag-usap kay Carlos, inanyayahan ni Wang ang mga estudyanteng Pilipino na samantalahin ang libu-libong scholarships para sa Masters at Ph.D na itinuturo sa mga pamantasan sa Tsina gamit ang  wikang Ingles.

Bilang pagtatapos, inulit ni  Carlos ang sinabi ni Pangulong Ferdinand Marcos Jr. na ang Tsina ay isang kapitbansa at partner. Maraming beses nang binanggit ng bagong upong pangulo ang kagustuhang isulong ang pinahusay (enhanced) at nakakabuting (constructive)  relasyon sa Tsina.

Ulat: Machelle Ramos

Patnugot sa nilalamn: Jade/Mac

Patnugot sa website: Jade 

Larawan: Opisyal na website ng Ministring Panlabas ng Tsina