Pangulong Aquino, dumating na sa Francia

Diyosesis ng Legazpi, handang tumulong sa mga lumikas

BIGAS INIHAHANDA NA. Makikita ang mga tauhan ng Philippine Army na tumutulong sa paghahanda ng relief goods sa Albay Province. Mayroong 10,000 mga inilikas mula sa mga nanganganib na pook sa paligid ng bulkang Mayon. (APSEMO Photo)

PAGKAING IPAMAMAHAGI SA MGA LUMIKAS, TIYAK NA. Handa ang Lalawigan ng Albay at Department of Social Welfare and Development sa pamamahagi ng bigas at iba pang kailangan ng mga lumikas. Makikita sa larawan ang mga kawal na nagbabalot ng bigas upang dalhin sa evacuation centers. (APSEMO Photo)

GOBERNADOR SALCEDA, NAKIPAGPULONG SA MGA KINATAWAN NG MGA AHENSYA NG PAMAHALAAN. Pinamunuan ni Gobernador Jose Sarte Salceda (naka pulang t-shirt) ang pulong ng mga ahensyang may gagampanang papel sa paglilikas ng mga naninirahan sa paligid ng bulkang Mayon. (APSEMO Photo)

TINIYAK ni Fr. Rex Arjona, Social Action Center director ng Legazpi na handa ang kanilang tanggapang tumulong sa mga lumikas mula sa six-kilometer permanent danger zone at mga nasa pito hanggang walong kilometrong expanded danger zones matapos itaas sa Alert Level 3 ang bulkang Mayon kamakalawa ng gabi.

Sa isang panayam, sinabi ni Fr. Arjona na umiikot na ang kanilang mga tauhan sa mga evacuation center na kinalalagyan ng mga lumikas upang alamin kung ano ang kanilang kailangan. Walang nakikitang problema si Fr. Arjona kung pagkain ang pag-uusapan sapagkat handa ang pamahalaang lokal at Department of Social Welfare and Development.

Ayon kay Fr. Arjona, nag-utos na si Bishop Joel Z. Baylon sa mga pari ng Diyosesis ng Legazpi na buhaying muli ang Harong Volunteers na binubuo ng mga pamilyang nagbubukas ng kanilang tahanan sa mga nagsilikas upang mabawasan ang maninirahan sa evacuation centers.

Bukas magpupulong ang mga pari mula sa mga parokyang pinagmulan ng evacuees upang alamin ang kanilang pangangailangan at kung anong hanapbuhay ang pakikinabangan samantalang na sa malubhang kalagayan ang bulkang Mayon.

Pag-uusapan din ang pagdalaw ng mga pari sa evacuation center upang magdaos ng misa at tumugon sa mga pangangailangang ispiritwal ng mga nagsilikas.

Ayon kay Secretary Corazon Juliano Soliman, umabot na sa 10,000 katao ang nailikas nina Gobernador Jose Sarte Salceda. May nakalaang bigas at non-food items para sa mga lumikas, dagdag pa ng kalihim.

Ibinalita naman ni Dr. Cedric Daep, ang pinuno ng Albay Public Safety and Emergency Management Office, na iniulat ng Philippine Institute of Volcanology and Seismology na patuloy ang pagpaparamdam ng bulkang Mayon ng kakaibang kalagayan sa pamamagitan ng dumaraming pagyanig ng lupa, mas mataas na sulfur dioxide emission at ang patuloy na pamamaga ng bulkan.