Nurse na may MERS Coronavirus, nasa Pilipinas
IBINALITA ng Kagawaran ng Kalusugan ngayon na isang nurse na mula sa Dammam, Kingdom of Saudi Arabia ang nakapasok sa bansa noong ika-29 ng Agosto. Wala umanong sintomas ang nurse noong dumating sa Maynila.
Sa isang press briefing kanina, sinabi ni Kalihim Enrique Ona ng Kagawaran ng Kalusugan, dalawang nurse na may initials na CB at AP mula sa Dammam ang dumating sa Pilipinas sakay ng Saudia Airlines. Wala silang sintomas ng karamdaman ng pumasok sa bansa. Bilang precautionary measure, isang health check ang ginawa sa kanila noong ika-25 ng Agosto.
Sa kanilang pagdating, si Nurse CB ay sinalubong ng sampung kamag-anak, kabilang ang dalawang apo. Samantala, si Nurse AP ay nakipanuluyan sa bahay ni CB hanggang sumapit ang kanyang biyahe pauwi noong ika-31 ng Agosto.
Kahapon, si Nurse CB at dalawang apo ay nilagnat. Silang tatlo, kasama ang iba pang sumalubong ang kumunsulta sa Lung Center of the Philippines at nabatid na negative sa karamdaman.
Ang health authorities sa Saudi Arabia ang nagbalita na negative ang results ng pagsubok kay Nurse CB subalit positibo naman sa MERS Coronavirus si Nurse AP.
Ibinalita ni Nurse CB sa DOH ang findings at nagbigay ng impormasyon hinggil sa kinaroroonan ng kanyang kasama. Kahapon ay natagpuan si Nurse AP sa South Cotabato at tinanggap agad sa Southern Philippines Medical Center. Wala siyang sintomas ng karamdaman pagdating sa pagamutan. Ang specimen ay ipinadala sa Reseach Institute for Tropical Medicine upang magkaroon ng higit na pagsusuri.
Sinabi ni Kalihim Ona na ginagawa ng pamahalaan ang lahat na matagpuan ang lahat ng mga pasaherong sakay ng Saudia Airlines, kabilang na ang domestic flight patungong South Cotabato.
Nanawagan si Kalihim Ona sa lahat ng mga pauwing Overseas Filipino Workers na mayroong sitomas ng karamdaman na makipagtulungan sa mga autoridad upang maiwasan ang pagkalat ng karamdaman at matiyak ang kanilang kaligtasan sampu ng kanilang pamilya.
Sintomas ng MERSCOV ang tila trangkaso na may lagnat, ubo at pagdudumi. Nakamamatay ang karamdamang ito kung hindi magagamot kaagad.
Limitado ang impormasyon kung paano kumakalat ang karamdaman subalit malaki ang posibilidad na ito ay sa pamamagitan ng direct contact sa mga kasama sa bahay at healthcare providers na exposed sa mga kumpirmadong kaso. Ginagawa ang pagsusuri sa pamamagitan ng serology at DNA tests. Makatutulong din ang maagang paggamot.
Wala pang travel restrictions patungo at mula sa Gitnang Silangan. Pinapayuhan ang mga naglalakbay sa gitnang silangan na umiwas sa mga taong tila may trangkaso at nararapat madalas maghugas ng kamay. Nararapat silang mag-ulat sa pagamutan sa oras na magkaroon sila ng karamdaman matapos ang 14 na raw ng pagdating at iwasan ang pagdalaw sa matataong pook hanggang sa mawala ang sintomas. Inatasan ng Kagawaran ng Kalusugan ang lahat ng pagamutan na mag-ulat sa oras na may matagpuang sintomas ng MERSCoronavirus.
1 2 3 4 5 6
