Marami pa ring mahihirap sa mga nakaligtas sa bagyong "Yolanda"
LUMABAS sa pagsusuri ng IBON Foundation na walo sa bawat sampu sa mga nakaligtas sa bagyong "Yolanda" ang nabubuhay sa kitang wala pa sa halagang P 34 bawat araw. Hindi umano nakarating ang biyayang inaasahan ng mga biktima.
Tinataya ng IBON na apektado ng bagyo ang may 5.6 hanggang 6 na milyong manggagawa sa sektor ng pagsasaka, pangingisda, kalakal at mga sasakyan. Ang agricultural income sa mga apektadong pook ay tinatayang bumaba ng 50% hanggang 70% matapos tumama si Yolanda.
Magugunitang ang Eastern Visayas ay isa sa pinakamahirap na rehiyon sa Pilipinas bago pa man tumama ang bagyo.
Sa mga nagkatrabaho, isang survey na ginawa sa 1,094 na respondents sa anim na lalawigan sa silangang Kabisayaan ang nagpakita na walo sa bawat 10 pamilya ang kumikita ng wala pang P 5 libo sa bawat buwan. Karamihan sa mga respondents ang may pamilyang may lima o higit pang miyembro.
Naibalita ng pamahalaan na may 215,471 pamilya ang nabigyan ng livelihood support sa pamamagitan ng madaliang "Cash for Building Livelihood Assets". Nangangahulugan na may 780,000 pamilya ang walang livelihood support o umaasa sa kalat-kalat na ayuda ng non-government organizations at pribadong sektor.
Tinataya ang mga evacuees sa bilang na 918,621 pamilya samantalang ang bilang ng mga tahanang napinsala ay 1.2 milyon.
Idinagdag pa ng IBON na may 250,000 pamilya o 1.3 milyong katao ang walang katiyakan ang tinitirhan sapagkat nasa evacuation centers, tent cities, bunkhouses at mga taong nakapagtayo ng tahanan sa mga deklaradong "no-build" areas. Mayroon lamang 364 na tahanan ang naitayo sa Tanauan at Tacloban sa Leyte.
Naibalita ng IBON na nagawa na ng Office of the Presidential Assistant for Rehabilitation and Recovery na nakapagtayo na ng 213 classrooms mula sa target na 19,648, 27 sa target na 132 pamilihan, 64 kilometro mula sa target na 431 kilometrong farm-to-market at national roads, 3 sa 34 na tulay.
Hindi lamang umano mabagal ang pamahalaan sa kanilang pagtulong. Salat pa rin sa pagpapa-ayos ng mga napinsalang mga barangay.
1 2 3 4 5
