Simbahan, sinusuri ang panukalang Bangsamoro Basic Law
Hindi magtatagal ay maglalabas ng panukala ang Catholic Bishops Conference of the Philippines ng kanilang paninindigan hinggil sa Bangsamoro Basic Law. Ito ang sinabi ni Arsobispo Socrates Villegas, pangulo ng CBCP sa isang press briefing kahapon/
Isusumite nila ang kanilang paninindigan sa Kongreso at Senado na nagbabalangkas ng panukalang batas. May tatlong batayang hinihiling si Arsobispo Villegas hinggil sa panukalang batas.
Kailangang magkaroon ng malawakang konsultasyon sa lahat ng mga mamamayan sapagkat hindi lamang para sa Mindanao, Katimugang Pilipinas ang panukala sapagkat ito ay makaaapekto sa buong bansa. Nararapat makonsulta ang lahat at pag-aralan ng mga mamamayan ang panukalang batas bilang bahagi ng pagiging mabuting mamamayan.
Hiniling din niya na isama sa konsultasyon ang mga katutubo, kahit ang mga Kristiyano na kabilang sa minorya sa ilang lalawigan. Binanggi na umano ni Pope Francis na nararapat pakinggan ang mga nasa labas o malayo sa pamahalaan at lipunan.
Wala umanong masama sa pagbibigay ng autonomiya sa mga Bangsamoro subalit hindi nararapat magkaroon ng autonomiya kung mawawalang-saysay ang integridad ng nasasakupan ng bansa. Hindi kailangang isakripisyo ang integirdad at magiging immoral na pumayag ang karamihan sa paghiwalay ng bahagi ng bansa. Hindi ethical at moral na magkaroon ng pagkakahiwalay ng kapuluan, dagdag pa ng arsobispo.
Idinagdag pa niya na nais lamang nilang matiyak na mapapanatili ang territorial integrity ayon sa itinatadhana ng Saligang Batas. Hindi sila maninindigan sa isyung legal sapagkat ang kanilang sandigan ay ang tinaguriang ethical perspective.
Ipinaliwanag naman ni Arsobispo Romulo Valles ng Davao, pangalawang pangulo ng CBCP na kung pababayaang walang maliwanag na konsultasyon at pag-uusap, may posibilidad na lalong maging magulo ang situasyon. Ang kawalan ng pagkakaisa ay susi sa kaguluhan, ayon pa kay Arsobispo Valles.
Nararapat maging interesado ang madla at kung susundin ang deadline ni Pangulong Aquino, nararapat pakinggan ang lahat.
Ipinaliwanag pa ni Arsobispo Villegas na dapat angkinin ng lahat ang panukalang batas sapagkat mas mahalaga ang proseso ng pagpapanday ng batas kaysa sa produkto.
1 2 3 4 5
