Philippine Red Cross, nagpasalamat sa mga kabalikat
PHILIPPINE RED CROSS, NAGPASALAMAT SA MGA TUMULONG. Pinasalamatan ni Phil. Red Cross Chairman Richard Gordon ang iba't ibang Red Cross societies sa tumulong sa Pilipinas noong tamaan ni "Haiyan/Yolanda" noong 2013. Kabilang sa kanyang binanggit ang Tsina na nagpadala ng med-evac hospital at may 166 silid-aralan. Binanggit din niya ang tatlong payloaders na ipinagkaloob ni Ambassador Ma Keqing. (Melo M. Acuna)
PINALAMATAN ni dating Senador Richard Gordon ang mga kasama sa iba't ibang Red Cross societies sa iba't ibang bansa sa paggunita sa ika-18 buwang anibersaryo ng paghagupit ni "Yolanda" noong ika-walo ng Nobyembre 2013.
Kabilang sa mga dumalo si Kari Isomaa, ang Head of Delegation ng International Federation of Red Cross and Red Crescent Societies sa Pilipinas. Ayon kay G. Gordon, mula sa target na 83,127 mga pamilyang nangangailangan ng tahanan, nakatulong ang Red Cross sa may 54,765 mga pamilya sa iba't ibang bahagi ng bansang tinamaan ng malakas na bagyo.
Sa pamamagitan ng may 744 na Barangay Recovery Committees, higit na napadali ang pagkilala sa kanilang mga tutulungan. Nangako noon ang Red Cross na maglalaan ng livelihood assistance sa may 58,581 na tahanan at mula sa bilang na ito, nakapagparating sila ng tulong sa may 55,389 na tahanan. Nagkaroon din ng cash relief assistance noong nasa ilalim pa ng emergency phase at nakapagsanay ng may 706 na mamamayan sa larangan ng skills training.
Sa panayam, binanggit din ni G. Gordon na nakatulong din ang Tsina sa pamamagitan ni Ambassador Ma Ke Qing sa pagdadala ng tatlong payloaders, isang med-evac hospital na ginagamit pa nila hanggang ngayon at ang may 166 na silid aralan na itinayo sa Leyte.
1 2 3 4 5
