Pangulong Aquino, nagulat sa mga inihayag ni G. Binay
HINDI maunawaan ni Pangulong Benigno Simeon C. Aquino III kung bakit nagsalita ng ganoon si Pangalawang Pangulong Jejomar C. Binay samantalang ginawa na naman niya ang lahat upang tulungan ang kanyang bise presidente.
Ani Pangulong Aquino, nahalal si G. Binay ng mga mamamayan at nabigyan ng pagkakataon upang hindi maging spare tire. Ito ang kanyang pahayag sa pagtatapos ng Livestock Expo at Convention kanina.
Noong Lunes ay nagbitiw si Pangalawang Pangulong Binay sa kanyang posisyon sa gabinete. Kahapon, sinabi naman ni G. Binay na manhid at palpak ang Administrasyong Aquino.
Idinagadag pa ni Pangulong Aquino na nagulat siya sa pagbibitiw ni G. Binay.
Ibinigay umano ng pamahalaan kay Binay ang pagkakataon na magtagal ang kanyang popularity ratings kahit pa hindi kaalyado noong tumakbo sila noong 2010.
Maaari umanong may mga lihim na paraan si G. Binay kung paano mapapatakbo ng mas mahusay ang pamahalaan. Baka umano napagtanto ni G. Binay na hindi siya ang itataguyod ng pangulo sa darating na halalan kaya't tumiwalag na sa administrasyon, dagdag pa ni Pangulong Aquino.
1 2 3 4 5
