Kaguluhan inaasahan sa pagbibigay ng tahanan sa mahihirap
DALAWANG senador ang nangangambang mauuwi sa kaguluhan ang desisyon ni Pangulong Duterte na ibigay sa mga maralitang taga-lungsod na kabilang sa Kadamay ang mga tahanang nakalaan para sa mga pulis at kawal.
Ayon kay Senador Richard Gordon, kasama sa senate majority bloc, nalungkot siya sa desisyon na maaaring maglagay sa pangulo sa isang bitag.
Maaaring mahirap ang mga kasapi ng Kadamay subalit wala ito sa kaayusang pasukin nila ang pag-aari ng iba. Malubha na ang problemang dulot ng mga maralitang taga-lungsod. Nakikita na ang kawalan ng paggalang sa batas, dagdag pa ng senador.
Sa talumpati ni Pangulong Duterte sa pagdiriwang ng Philippine Army ng kanilang ika-120 taong anibersaryo, sinabi niyang ipagkakaloob na lamang niya ang mga tahanan sa mga mahihirap kasabay ng pangakong magkakaroon ng mas magandang tahanan para sa mga pulis at kawal na siyang nararapat tumanggap ng mga tahanan.
Ang desisyong huwag nang galawin ang mga pumasok na mga mahihirap sapagkat nanglalaban ay hindi magandang pangitain. Bagama't ipinagpasalamat ni Senador Gordon ang pagpapagawa ng mga bagong tahanan para sa mga kawal at pulis, mababaw ang rasong ginamit ng pangulo na huwag nang galawin ang mga maralitang taga-lungsod sapagkat nanlalaban sila.
Para kay Senador Panfilo Lacson, isa ring kabilang sa majority bloc, ang pagpapahintulot sa mga kasapi ng Kadamay sa mga tahanang hindi nakalaan para sa kanila ay paanyaya sa kawalan ng paggalang sa batas.
Kailangang maging maayos ang pagkakaloob ng mga tahanan sa mahihirap. Nangangamba si Senador Lacson na mauulit pa ito sa ibang pook at kung hindi mapipigil, isang malaking problema itong kahaharapin ng pamahalaan.
1 2 3 4
