Mga turista sa Bicol, dumarami
TSINA, PANGALAWA SA MGA BANYAGANG DUMADALAW SA BICOL. Kasunod ng Estados Unidos ang Tsina sa dami ng mga turistang dumadalaw sa Bicol Region. Ayon kay Tourism Director Maria Ravanilla, pangatlo ang mga Aleman, pang-apat ang mula sa Timog Korea at panglima ang mga nagmuila sa Australia. Umaasa si Director Ravanilla na madaragdagan pa ang mga banyagang dadalaw sa Bicol na kinatatagpuan ng bulkang Mayon at magagandang mga tabing-dagat. (Melo M. Acuna)
UMABOT sa 700,000 mga turista ang dumalaw sa Bicol Region noong nakalipas na taon. Patuloy umanong lumalaki ang bilang ng mga banyagang turista na mula sa Estados Unidos, Tsina, Alemanya, Timog Korea at Australia.
Ito ang sinabi ni Tourism Regional Director Maria Ravanilla sa isang panayam sa Lungsod ng Legazpi kanina. Target nilang magkaroon ng isang milyong mga turista pagsapit ng 2016.
Layunin nilang makapag-ambag man lamang ng 10% sa target ng Department of tourism na 10 milyong tourist arrivals sa 2016. Masaya si Director Ravanilla sapagkat mayroong mga investors na nagtatayo ng mga hotel at iba pang tourism-related facilities.
Nagpapasalamat din siya sa Aquino Administration sa paglalagay ng mga lansangan at iba pang pagawaing-bayan tungo sa mga magagandang tanawin sa Bicol. Isinusulong nila ni Albay Governor Jose Sarte Salceda ang mga magagandang tanawin sa AlMaSor o Albay, Masbate at Sorsogon.
Makakatulong din ang pagdating ng mga turista sa "Triple C" o Catanduanes, Camarines Sur at Camarines Norte na mayroon ding mga magagandang pook. Bagaman, inamin ni Director Ravanilla na mas maraming domestic tourists sa Camarines Sur dahil sa Penafrancia Pilgrimage na dinadayo ng mga deboto sa bawat Setyembre.
Karamihan ng mga banyagang turista ang dumadalaw sa Albay, Sorsogon at Masbate.
Malaking tulong din ang mga kumbensyon na idinaraos sa Legazpi City na dinadaluhan ng mula 4,000 hangang 5,000 mga delegado.
Higit umanong madagaragdagan ang mga turistang dadalaw sa Bicol Region sa oras na mapakinabangan na ang mga tren ng Philippine National Railways.
1 2 3 4 5 6
