Naghahabol ng oras ang pamahalaan
PAMAHALAAN, NAGHAHABOL NA NG ORAS. Ito ang paniniwala ni Dean Julkipli Wadi, pinuno ng Islamic Studies sa UP Asian Center hinggil sa Bangsamoro Basic Law. Magugunitang binuo ang panukalang batas ng Bangsamoro Transition Commission na pinamunuan ni MILF Chief Negotiator Mohager Iqbal. Nang dalhin ang sipi sa Malacanang, nagkaroon umano ng pagbabago ang legal team ng pamahalaan kaya't nagagahol na sa oras ang magkabillang panig. (Melo Acuna)
TILA kapos na sa panahon ang pamahalaan sa pagtataguyod ng kapayapaan sa Mindanao.
Ito ang paniniwala ni Dean Julkipli Wadi ng Institute of Islamic Studies ng UP Asian Center sa kanyang pagharap sa mga kasapi ng civil society kaninang umaga.
Ani Dean Wadi, matapos ang apat na taong peace talks, ang Pamahalaan ng Pilipinas at Moro Islamic Liberation Front ay patuloy na nahaharap sa hamon ng legalidad ng kasunduan kung pagbabatayan ang Saligang Batas ng Pilipinas.
Magugunitang ang nilalaman ng kasunduan ang naging sandigan ng Bangsamoro Basic Law na mahaharap sa pagsusuri ng Kongreso, at maaaring makarating pa sa Korte Suprema.
Ang pagtatangka ng Malacanang na mapalabnaw ang Bangsamoro Basic Law sa paggigiit ng Moro Islamic Liberation Front na magkaroon ng isang Bangsamoro government sa 2016 ang senyales ng kahirapang haharapin ng magkabilang panig.
Bahagi ng pressure ang pagbabago ng buod ng Bangsamoro Basic Law na pinakinabangan ng pamahalaang Aquino sa pagkakaroon ng mataas na popularity ratings. Nasa defensive stances ang pamahalaan kasunod na desisyon ng Korte Suprema hinggil sa kontrobersyal na DAP at ang tatlong impeachment charges laban kay Pangulong Aquino.
Tila walang nagaganap na pagkakaisa sa pagitan ng mga Muslim na pawang stakeholders sa kasunduan. Ang Sabah standoff at ang naganap na sagupaan sa Zamboanga noong nakalipas na taon at ang paghahasik ng lagim ng ibang rebel groups ay pagpapakita lamang ng sintomas ng malubak na daan tungo sa kapayapaan sa Mindanao.
Idinagdag pa ni Dean Wadi na marami ang nababahala kung paano mapapag-isa ng Aquino Administration ang iba't ibang sangay ng pamahalaan at ang mga mamamayan upang suportahan ang proyektong inaasahang magwawakas sa kaguluhan sa Mindanao.
1 2 3 4 5 6 7 8
