Simbahan, nanawagan sa pamahalaan laban sa relokasyon
NANAWAGAN ang National Secretariat of Social Action sa pamahalaan na huwag ituloy ang balak ng pamahalaang lokal ng Tacloban na ilikas ang may 3,500 pamilya mula sa tinaguriang danger zones.
Ayon sa koalisyon ng may 163 samahan at sampung non-government organizations, nakatakdang gibain ng pamahalaang lokal ang mga tahanan ng mga naninirahan sa 15 barangay sa tabing-dagat partikular sa Magallanes at San Jose Districts sa Tacloban City.
Minamadali umano ang paggiba ng mga tahanan sa kautusan ni Pangulong Duterte upang matapos ang pagtatayo ng mga bagong tahanan para sa mga nakaligtas sa bagyong "Yolanda" sa darating na buwan ng Disyembre.
Sa kanilang liham kay Cabinet Secretary Jun Evasco, sinabi ng samahan na kailangang pagbalik-aralan, baguhin at paghusayin ang rehabilitation at reconstruction process.
Mahirap ilipat sa hilagang bahagi ng lungsod ang mga biktima sapagkat walang hanapbuhay at mahirap makarating sa mga paaralan, pamilihan at pagamutan.
Wala pa umanong tubig at kuryente sa hilagang bahagi ng lungsod, dagdag pa ng grupo. Bukod sa NASSA/Caritas, kasama rin sa koalisyon ang Urban Poor Associates at Canadian Catholics for Development and Peace.
Kasama rin sila ng Arkediyosesis ng Palo at Congregation of the Most Holy Redeemer sa pagpapaunlad ng "Pope Francis Village," isang pangmatagalan at in-city relocation site sa Barangay Diit, Tacloban City na makatatanggap ng 550 pamilyang nawalan ng tahanan at kabuhayan dala ng bagong "Yolanda."
1 2 3 4 5
