KAILANGANG itigil ang ginagawang pagdinig sa panukalang Bangsamoro Basic Law at alamin kung ano ang naganap sa Mamasapano, Maguindanao noong nakalipas na ika-25 ng Enero. Magugunitang nasawi ang may 60 katao na kinabibilangan ng mga tauhan ng Special Action Force ng Philippine National Police, mga mandirigma ng Moro Islamic Liberation Front at mga sibilyan sa madugong sagupaan.
CONFIDENCE-BUILDING KAILANGAN. Ito ang sinabi ni Senador Ferdinand Romualdez Marcos, Jr. sa kanyang talumpati sa "Prospects for the Philippines" ng Foreign Correspondents Association of the Philippines. Sinabi ng mambabatas na may mga kailangang gawin ang panig ng pamahalaan at Moro Islamic Liberation Front matapos ang madugong sagupaan sa Mamasapano, Maguindanao noong nakalipas na Enero.
Ito ang sinabi ni Senador Ferdinand Romualdez Marcos, Jr. sa kanyang pagharap sa Prospects for the Philippines forum na itinaguyod ng Foreign Correspondents Association of the Philippines sa Fairmont Hotel sa Makati.
Ipinaliwanag ng mambabatas na pinagtatangkaan nilang matapos ang mga public hearing hinggil sa panukalang batas ng biglang naganap ang sagupaan noong nakalipas na buwan. Ani G. Marcos, kailangang mabatid ang katotohanan sa madugong sagupaan. Bagaman, hindi sila mananatiling maghihintay ng ginagawang pagsisiyasat sapagkat kailangang maipon ng bubuuhing "Truth Commission" ng Senado ng Pilipinas upang makita ang tunay na larawan ng insidente.
Maliwanag umanong nawala ang pagtitiwala ng taongbayan sa peace process kaya't kailangang kumilos ang Pamahalaan ng Pilipinas at ang Moro Islamic Liberation Front sa pagkakaroon ng mga confidence-building measures.
Sa panig ng pamahalaan, kailangang ipaliwanag kung ano ang tunay na naganap samantalang sa MILF, kailangang maibalik ang mga sandata at mga kagamitan ng pulis na napaslang. Nakalipas na umano ang 15 araw at wala pang nagaganap at hindi naman dumadalo sa pagdinig ng Senado ang mga pinuno ng MILF.
Marapat ding ipaliwanag ng MILF kung ano ang kanilang relasyon sa Bangsamoro Islamic Freedom Fighters na nakipag-alyansa na sa ISIS na pinagmumulan ng kaguluhan sa Middle East.
Makatutulong din kung ang MILF na mismo ang magdadala ng mandamiento de arresto sa sinasabing teroristang si Usman at ilan pang mga terorista sa kanilang nasasakupan.
Marami umanong matutuhan ang pamahalaan sa mga kasunduang nilagdaan ng Pilipinas sa ilalim ng Tripoli Agreement noong 1976 at sa GPH-MNLF Peace Agreement na nilagdaan noong 1996. Dapat suriin hindi lamang ang autonomiyang ibinigay sa kanila kungdi ang mga kaunlarang inasahan sa ekonomiya ng pook na tila nalimutan ng pamahalaan.
Naniniwala pa rin si Senador Marcos na makatutulong ang mga pagsusuring ito sa proseso tungo sa kapayapaan.
1 2 3 4 5 6 7 
